Ստորագրվեց համագործակցության հուշագիր ԿԶՆԱԿ հիմնադրամի և «ՍՏԵՄ ՄԻՈՒԹՅՈՒՆ» գիտակրթական հասարակական կազմակերպության միջև
«Կրթության զարգացման և նորարարությունների ազգային կենտրոն» հիմնադրամի տնօրենի ժամանակավոր պաշտոնակատար Արտաշես Թորոսյանը և «ՍՏԵՄ ՄԻՈՒԹՅՈՒՆ» գիտակրթական հասարակական կազմակերպության տնօրեն Հայկազ Բաղիյանը ս/թ մայիսի 22-ին կնքեցին համագործակցության հուշագիր՝ ՀՀ հանրակրթության ոլորտում իրականացվող բարեփոխումներին ու ծրագրերին աջակցելու, առաջնորդվելով «ՀՀ կրթության՝ մինչև 2030 թվականը զարգացման» պետական ծրագրով կրթական համակարգի կայուն զարգացմանը, հզորացմանը և բարգավաճմանը նպաստելու և կրթության բնագավառում համատեղ արդյունավետ համագործակցություն հաստատելու նպատակով:
Հանդիպմանը ներկա էր նաև ԿԶՆԱԿ հիմնադրամի ուսումնական բնագավառների մշակման և զարգացման բաժնի մասնագետ Մարիամ Սարգսյանը։
Հանդիպման ժամանակ ԿԳՄՍՆ «Կրթության զարգացման և նորարարությունների ազգային կենտրոն» հիմնադրամի տնօրենի ժ/պ Արտաշես Թորոսյանն ընդգծեց, որ երկու կառույցների կրթության ոլորտի առաջատար մասնագետների ու փորձագետների ներգրավմամբ համագործակցությունը կնպաստի հանրակրթական ուսումնական հաստատություններում դասավանդողների մասնագիտական ունակությունների շարունակական զարգացմանը և կատարելագործմանը։
«ՍՏԵՄ ՄԻՈՒԹՅՈՒՆ» գիտակրթական հասարակական կազմակերպության տնօրեն Հայկազ Բաղիյանը կարևորելով համագործակցության մեկնարկը հավելեց, որ նախատեսվում է իրականացնել համատեղ աշխատանքներ ԵՄ դպրոցական ցանցի, Եվրոպայի խորհրդի, ՄԱԿ–ի UNESCO, ICAAN, INSAFE և INHOPE կազմակերպությունների գործունեության շրջանակներում միջազգային կապերի և համագործակցության զարգացման, ամրապնդման և խորացման համար։
Comments
Post a Comment