Ս/թ հուլիսի 1-4-ը, արդեն 4-րդ անգամ, տեղի ունեցավ EduArmenia նախաձեռնության կողմից կազմակերպած ամենամյա համահայկական գիտակրթական աշխատաժողովը:
Աշխատաժողովն ընթանում էր «Կիրառի՛ր գիտելիքդ և փորձառությունդ հանուն հայրենիքի զարգացման» խորագրի ներքո. այն անցկացվում էր երկու ձևաչափով՝ առկա և հեռավար: Այս տարի հեռավար ձևաչափով մեկնարկը տրվեց հուլիսի 1-ին, իսկ առկա հանդիպումներինը՝ հուլիսի 3-4-ին: Աշխատաժողովի ընթացքում կրթական ոլորտի ներկայացուցիչները հանդես եկան ոլորտի զարգացմանն ու բարեփոխումներին նվիրված բանախոսություններով և դասախոսություններով:
Առկա ձևաչափով աշխատաժողովի բացման հանդիսավոր արարողությանը մասնակցում էին ՀՀ ԿԳՄՍ նախարարի տեղակալ Արաքսիա Սվաջյանը, Խ. Աբովյանի անվան հայկական պետական մանկավարժական համալսարանի ռեկտոր Սրբուհի Գևորգյանը, ԿԶՆԱԿ հիմնադրամի տնօրենի ժ/պ Արտաշես Թորոսյանը, «EduArmenia»-ի համահիմնադիր Լիլիթ Մկրտչյանը, դասախոսներ, ուսուցիչներ, ոլորտի մասնագետներ և շահագրգիռ կառույցների ներկայացուցիչներ:
ՀՀ ԿԳՄՍ նախարարի տեղակալ Ա.Սվաջյանը ողջունելով աշխատաժողովի մասնակիցներին, կարևորեց նմանօրինակ միջոցառումների դերը կրթական բարեփոխումների գործընթացում: Նա նշեց, որ այն համախմբում է ոլորտի տարբեր կառույցներին, բացահայտում փոփոխության ձգտող մանկավարժական համայնքի ներուժը:
ԿԶՆԱԿ հիմնադրամի տնօրենի ժ/պ պարոն Թորոսյանը ևս իր ելույթում կարևորեց նմանատիպ միջոցառումների կազմակերպումը՝ ոլորտում առկա խնդիրների վերհանման, մանկավարժական նոր գաղափարների քննարկման, ոլորտի զարգացմանն ու բարեփոխումներին նվիրված մտքերի փոխանակման առումով:
Հիմնադրամի կրթական նորարարությունների ու հետազոտությունների վարչության պետ և «EduArmenia» նախաձեռնության համահիմնադիր Լիլիթ Մկրտչյանը ողջունելով ներկաներին կարևորեց համագործակցությունը կազմակերպության և հանրապետության կրթական կառույցների միջև, նմանատիպ միջոցառումներին մանկավարժների ակտիվ մասնակցությունը, որի ժամանակ ծնվում են նոր գաղափարներ, ներկայացվում են նորարարական տարբեր մեթոդներ, որոնք մանկավարժները սիրով կիրառում են իրենց դասերի ընթացքում:
Աշխատաժողովի կազմակերպչական աշխատանքներին մասնակցել են նաև ԿԶՆԱԿ հիմնադրամի կրթական նորարարությունների ու հետազոտությունների վարչության աշխատակիցները, որոնք օժանդակություն ցուցաբերեցին թե առցանց հանդիպումների համակարգմանը, թե առկա ձևաչափով անցկացվող աշխատանքներին:
ԿԶՆԱԿ հիմնադրամ, կրթական նորարարությունների բաժին
Comments
Post a Comment