«Իմ կյանքը համայնքում-6» ծրագրի ամփոփում

Նոյեմբերի 8-ին Արարատի մարզի Եղեգնավանի միջնակարգ դպրոցում տեղի ունեցավ «Իմ կյանքը համայնքում-6» ծրագրի ամփոփիչ միջոցառումը։ Ծրագիրն իրականացվել է հոկտեմբեր ամսին,  որին մասնակցել են 24 դպրոց՝ Երևանից և ՀՀ բոլոր մարզերից,  որոնցից ներգրավվել էին 71  սովորող։  Ծրագրի առանցքում է եղել  հայրենաճանաչությունը, տեղանքի, մշակույթի, պատմության, ավանդույթների ուսումնասիրությունը։ Ծրագրի ընթացքում սովորողները մեկ շաբաթ հյուրընկալվել են այլ համայնքում, կրթությունը շարունակել տվյալ համայնքի դպրոցում և բնակվել համայնքի ընտանիքներից մեկում։ Այս անգամ ծրագրին մասնակցում էին սահմանամերձ գյուղերի դպրոցներ։

Ամփոփիչ միջոցառմանը մասնակցում էին  ԿԶՆԱԿ հիմնադրամի գործադիր տնօրենի տեղակալ Լ.Մկրտչյանը և Ուսուցիչների մասնագիտական զարգացման բաժնի պետ Ն.Սիրականյանը, Հետազոտությունների բաժնի մասնագետներ Գ.Սահակյանը և Մ.Ոսկանյանը, Արարատի համայնքապետարանի ներկայացուցիչներ։

ԿԶՆԱԿ հիմնադրամի գործադիր տնօրենի տեղակալ Լ.Մկրտչյանը ներկայացրեց ծրագրի նպատակը, արդյունքները և ազդեցությունները սովորողների սոցիալականացման, հայրենաճանաչության և արժեհամակարգի ձևավորման գործընթացի վրա։ Նա շնորհակալություն հայտնեց ծրագրին մասնակից բոլոր դպրոցներին և ԿԶՆԱԿ հիմնադրամի անունից շնորհակալագիր հանձնեց ամփոփիչ միջոցառման իրականացման համար հյուրընկալող՝ Եղեգնավանի միջնակարգ դպրոցի տնօրեն Հասմիկ Մայիլյանին։ Ծրագրին մասնակից բոլոր դպրոցները ստացան գրքեր ԿԶՆԱԿ հիմնադրամի կողմից։

Ամփոփիչ միջոցառմանը  մասնակից դպրոցների  սովորողները հանդես եկան առանձին տաղավարներով՝ ներկայացնելով համայնքում ապրելու և սովորելու ընթացքում իրենց ձեռքբերումներըը։ Նրանք հատկապես կարևորեցին ինքնուրույնության, որոշումներ կայացնելու,  ինքնակազմակերպման և ինքնաճանաչման հմտություններըի ձեռքբերումները, հայրենաճանաչությունը և միմյանց ճանաչելու միջոցով փոխադարձ հարգանքի ձևավորումը։ Ամփոփիչ միջոցառումն ուղեկցվեց գեղեցիկ երգ ու պարով, վիրտուալ էքսկուրսիայով, իսկ միջոցառումն ամփոփվեց սովորողների կողմից «Իմ կյանքը համայնքում» ծրագրի մասին երգի կատարմամբ, որը գրվել էր որպես ծրագրի հիմն Եղեգնավանի դպրոցի ներկայացուցիչների կողմից։