Կրթությունը որպես ատելության խոսքի դեմ պայքարի գործիք

Ամեն տարի հունվարի 24-ը ՅՈՒՆԵՍԿՕ-ի կողմից նշվում է որպես  «Կրթության միջազգային օր»։

Այս տարի ՅՈՒՆԵՍԿՕ-ն այդ օրը նվիրել էր ատելության խոսքի դեմ պայքարին՝ «Կրթությունը որպես ատելության խոսքի դեմ պայքարի գործիք. ստեղծել անվտանգ և ներառական միջավայր բոլորի համար» կարգախոսով:

Ատելության խոսքը վերջին տարիներին ավելի ու ավելի մեծ տարածում է գտել հասարակության մեջ, ինչին նպաստում է նաև սոցիալական մեդիան, հասարակության մեծ մասի մեդիագրագիտության պակասը։

Ինչպես նշվում է ՅՈՒՆԵՍԿՕ-ի՝ «Հանուն խաղաղության, մարդու իրավունքների և կայուն զարգացման կրթության մասին» հանձնարարականում, կրթության դերն առանցքային է խաղաղության խթանման համար:

Այս համատեքստում չափազանց կարևորվում է կրթության դերը հարգանքի, հանդուրժողականության և ներառական մշակույթի ձևավորման գործում՝ մեծ տեղ տալով ուսուցիչների դերակատարությանը:

 «Կրթության միջազգային օրը» դպրոցներում կազմակերպելու համար ՅՈՒՆԵՍԿՕ-ի Aspnet դպրոցներին առաջարկվել էր ամսվա ընթացքում կազմակերպել միջոցառումներ, որոնք կօգնեին աշակերտներին պայքարել ատելության խոսքի դեմ, հասկանալ հարգանքի, հանդուրժողականության և կառուցողական հաղորդակցության կարևորությունը:  

Այդ նպատակով ՅՈՒՆԵՍԿՕ-ի Aspnet դպրոցներում իրականացվել են տարբեր միջոցառումներ․ հայտարարվել է «Բարի խոսքերի օր». դասարանում մեկը մյուսին շնորհակալական խոսքեր են գրել՝ նշելով, թե ինչի համար։ Պատրաստել են «Հանդուրժողականության ծառ», որտեղ աշակերտները թղթի վրա գրել են բարի խոսքերի օրինակներ և ամրացրել ծառի մանրակերտին։ Անցկացնել  են դասեր՝ մարդու իրավունքների, միջմշակութային երկխոսության և խտրականության դեմ պայքարի վերաբերյալ, բանավեճ-քննարկում՝ «Ինչպե՞ս պայքարել ատելության խոսքի դեմ համացանցում և իրական կյանքում» թեմայով և այլն։

Այս միջոցառումները կօգնեն աշակերտներին ոչ միայն հասկանալ ատելության խոսքի դեմ պայքարի կարևորությունը, այլև զարգացնել հմտություններ, որոնք նրանց կդարձնեն ավելի հանդուրժող և իրազեկ քաղաքացիներ:

Խաղաղության կրթությունը պետք է փոխակերպող և զորացնող լինի՝ ապահովելով, որ սովորողներն ունենան գիտելիքներ, արժեքներ, վերաբերմունք և հմտություններ՝ իրենց համայնքներում խաղաղության գործակալներ դառնալու համար:

                                            

                                                                        Նարինե Մնացականյան

ՈՒՄԶ բաժնի մասնագետ