Նոր չափորոշչի մշտադիտարկումներ

Նոր չափորոշչի ներդրմամբ փոխվել են ուսուցիչների մոտեցումները։ Եվ մեր մշտադիտարկումները նպատակաուղղված են՝ ստանալու չափորոշչի տրամաբանությունից  բխող մի շարք հարցերի պատասխաններ՝ 

ա/ ինչպե՞ս է փոխվել սովորողների տրամադրվածությունը դասերին 

բ/  դասին պատրաստվելիս և դասարանում ինչի՞ն է ուղղված ուսուցչի ջանքը 

գ/  սովորողները ինչո՞ւ են ուսումնասիրում այս կամ այն թեման․ նրանք դասի կամ թեմայի ավարտին ստանո՞ւմ են այս հարցերի պատասխանները։ 

Հոկտեմբերի 3-ին այցելելով Սևանի Մ․ Մաշտոցի անվան հ․ 1 դպրոց և ներկա գտնվելով հայոց լեզվի և գրականության ուսուցչուհի Մերի Գալստյանի դասին՝ ԿԶՆԱԿ հիմնադրամի ՀՊՉ և ՈՒԾ բաժնի պետ Գայանե Մկրտչյանն ու Շիրակացի գիտակրթական համալիրի գիտաուսումնական ամբիոնի ղեկավար  Թամար Ալեքսանյանը ստացան այդ հարցերի պատասխանները։  

8-րդ դասարանում Պ․ Դուրյանի «Լճակ» բանաստեղծության ամփոփումն էր։ Ուսուցչուհին հիմքում դրել էր մոդալության գաղափարը, հաջողությամբ միջառարկայական կապեր անցկացրեց և Դուրյանի ապրումները տեղափոխեց սովորողների հուզական տիրույթ։ Բաց ու անմիջական մթնոլորտում անցավ դասը։ 

Այցելեցինք նաև 9-րդ դասարան, որտեղ աշակերտները հարցեր էին պատրաստել էսսեի մասին, անկեղծ զրուցեցինք, պատասխանեցինք նրանց բոլոր հարցերին և տպավորված հեռացանք դպրոցից։ 

Հ․ Գ․ Բավական տպավորիչ էր դպրոցում տիրող մթնոլորտը, մուտքից սկսած՝ զգացվում էր դպրոցի ղեկավարության նվիրումն ու հոգատարությունը միջավայրի և ուսուցիչների հանդեպ։