Ամփոփվեցին «Հանրակրթական ուսումնական հաստատության վարչատնտեսական գործունեության կառավարումը» թեմայով դասընթացի արդյունքները

 

«ԿԶՆԱԿ» հիմնադրամը թվերով ամփոփում է «Հանրակրթական ուսումնական հաստատության վարչատնտեսական գործունեության կառավարումը» թեմայով դասընթացը։

Պետք է նշենք, որ նման նախաձեռնություն իրականացվում է առաջին անգամ։ Երևանի և Հայաստանի բոլոր մարզերից շուրջ 400 վարչատնտեսական մասի  համակարգող ս․թ․հունիսի 25-ից հուլիսի 14-ը մասնակցել է դասընթացին։ Դասընթացի շրջանակում ձևավորվել է 22 խումբ՝ յուրաքանչյուրը վեց ժամ տևողությամբ։ Դասընթացն իրականացվել է ծրագրին և թեմատիկ պլանին համապատասխան։ Հանդիպումները իրականացվել են հեռավար և տեսագրվել են։

Վերապատրաստումն ընդգրկել է հետևյալ թեմաները՝

• Հայաստանի Հանրապետության հիմնական ծրագրեր իրականացնող հանրակրթական ուսումնական հաստատության վարչատնտեսական աշխատողների գործառույթները։

• Հանրակրթական ուսումնական հաստատության վարչատնտեսական մասի կադրային կառավարումը ։ 

• Հանրակրթական ուսումնական հաստատության վարչատնտեսական մասի համակարգողի կողմից ֆինանսատնտեսական կառավարումը ։

• Հանրակրթական ուսումնական հաստատության վարչատնտեսական աշխատողների բարեվարքության կանոնները։

Դասընթացի  շնորհիվ և դրա շրջանակներում մասնակից համակարգողները  ձեռք բերեցին մասնագիտական նոր գործիքներ՝ ավելի արդյունավետ կազմակերպելու իրենց աշխատանքը, ինչպես նաև կարողացան՝

• տիրապետել հանրակրթական ուսումնական հաստատության համակարգողի գործունեության իրավական հիմքերին,

• նորովի ըմբռնել հաստատության ֆինանսատնտեսական կառավարման գործընթացի առանձնահատկությունները,

• բացատրել հաստատության ֆինանսավորման սկզբունքները և ֆինանսական կառավարման մոտեցումները,

• հաստատության գլխավոր հաշվապահի հետ միասին ապահովել հաշվապահական հաշվառման իրականացումը և հասկանալ օրենքով սահմանված կարգով հաշվապահական հաշվետվությունների ներկայացման ընթացքը,

• իրականացնել հաստատության վարչատնտեսական, ֆինանսական և կադրային ուղղությունների հիմնական փաստաթղթերի շրջանառությունը,

• արտահայտել իրենց դիրքորոշումը համակարգողի բարեվարքության հիմնական սկզբունքների պահպանման կարևորության շուրջ։

Դասընթացն իրականացրին  Երևանի քաղաքապետարանի ֆինանսական վարչության ոչ առևտրային կազմակերպությունների ֆինանսական գործառույթների կազմակերպման բաժնի պետ Արսեն Հարությունյանը և «ԿԶՆԱԿ» հիմնադրամի Հանրակրթական ուսումնական հաստատությունների  կառավարման  բաժնի մասնագետ Արմեն Հովսեփյանը: