Սեպտեմբերի 17-ին «ԿԶՆԱԿ» հիմնադրամի հյուրն էր «Հույսի կամուրջ» ՀԿ-ի նախագահ Սուսաննա Թադևոսյանը։
«Հույսի կամուրջ»-ը հասարակական կազմակերպություն է, որը զբաղվում է հաշմանդամություն ունեցող երեխաների և երիտասարդների իրավունքների պաշտպանությամբ:Վերջինիս առաքելությունն է պաշտպանել երեխաների և երիտասարդների իրավունքները ու արժանապատվությունը,ինչպես նաև նպաստել սոցիալական ներառմանը՝ Հայաստանի Հանրապետությունում:
Հանդիպում-քննարկման ժամանակ Սուսաննա Թադևոսյանը խոսեց նոր չափորոշիչների, նոր նախագծերի և ապագա համագործակցության մասին։ Նա նաև նշեց, որ «Հույսի կամուրջ» հասարակական կազմակերպության համար կարևոր է յուրաքանչյուր երեխայի գործընթացային ներառականությունը:
Հանդիպման ժամանակ «ԿԶՆԱԿ» հիմնադրամի տնօրենի ժ/պ Արտաշես Թորոսյանը կարևորեց կրթության ոլորտում համագործակցությունը այլ կրթական կառույցնեի հետ, քննարկեցին՝ ինչպես համագործակցեն այս հարցերի շուրջ, որոնք են լինելու այն կրթական կառույցները, որոնց հետ կմիավորվեն և համագործակցությունը կլինի ավելի արդյունավետ ու նպատակային։
Տիկին Թադևոսյանը նշեց,որ կրթության որակի համար շատ կարևոր է բոլոր կողմերի միասնական մոտեցումը, և ներառականությունը պետք է ապահովված լինի բոլոր գործընթացներում։
Հանդիպման վերջում «Հույսի կամուրջ» ՀԿ-ի նախագահ Սուսաննա Թադևոսյանը նշեց, որ հոկտեմբերի 14-ին և15-ին իրականացվելու է ներառական կրթության որակի գնահատման արդյունքների ներկայացում, որին ներկա կգտնվեն կրթության ոլորտի ներկայացուցիչներ։ Այդ հանդիպման ժամանակ «Հույսի կամուրջ» հասարակական կազմակերպության և կրթության զարգացման և նորարարությունների ազգային կենտրոնի միջև կկնքվի փոխըմբռնման հուշագիր՝ ի նպաստ ներառական և հավասարապես որակյալ կրթության՝ ցանկացած երեխայի համար։
Նյութի հեղինակ՝ Տաթևիկ Հարությունյան ( «ԿԶՆԱԿ» հիմնադրամ)
Comments
Post a Comment