Հուլիսի 12-ին «ԿԶՆԱԿ» հիմնադրամում տեղի ունեցավ հանդիպում հիմնադրամի տնօրեն ժ/պ Արտաշես Թորոսյանի և «Ալվան ծաղիկ սոցիալ-կրթական կենտրոն» ՀԿ հիմնադիր անդամ Ռենե Բեոնքի, տնօրեն Լիլիթ Գյունաշյանի և փոխտնօրեն Եստեր Գրիգորյանի հետ։
Գյումրիում գործող «Ալվան ծաղիկ սոցիալ-կրթական կենտրոն» ՀԿ-ն կրթական գործունեություն իրականացնող կառույց է, որը սերտորեն համագործակցում է Նիդերլանդների համանուն հիմնադրամի հետ։
Հանդիպման ընթացքում նշեցին, որ Գյումրի քաղաքի 2 ուսումնական հաստատություններում կիրականացվի վերը նշված պիլոտային ծրագիրը։
Նիդերլանդների «Ալվան ծաղիկ» հիմնադրամի նախագահը, միևնույն ժամանակ «Ալվան ծաղիկ սոցիալ-կրթական կենտրոն» ՀԿ-ի հիմնադիր անդամ Ռենե Բեոնքը 35 տարվա մանկավարժ է, վերջինս 7 տարի է, ինչ աշխատում է նաև որպես Տեխնազիում ծրագրի արտոնագրված քոուչ-ուսուցիչ։ 1988 թվականից ի վեր Ռենե Բեոնքը Շիրակի մարզում իրականացնում է մարդասիրական բազմաբնույթ գործունեություն՝ ներգրավելով նաև Նիդերլանդների գործընկերներին ։
Տեխնազիումը Նիդերլանդներում գործող նախագծահեն կրթության մոդել է, որը միտված է սովորողների մոտ թիմային աշխատանքի, հետազոտական կարողությունների զարգացմանը։
Տեխնազիում ծրագիրն իրականացնելով՝ նպաստում ենք ավելի բարվոք միջավայրի ստեղծմանը՝ կրթելով մեր աշակերտներին՝ որպես իրական արժեքներով առաջնորդվող, իրազեկ և ինքնավստահ քաղաքացիների։
Տեխնազիումային կրթության սկզբնական նպատակն է միջնակարգ դպրոցի աշակերտների համար գիտության և տեխնիկայի ոլորտներն ավելի գրավիչ և հետաքրքիր դարձնելը: Նման կրթությունը սովորողներին ակտիվացնելու դիդակտիկ միջոց է, որը կստեղծի անհրաժեշտ ոգեշնչող և գրավիչ ուսումնական մի միջավայր, որի նպատակը սովորողներին խրախուսելն է և նրանց՝ գիտատեխնիկական ուղղվածությամբ կրթություն ստանալուն նախապատրաստելը։ Այն կօգնի սովորողներին ավելի հիմնավորված որոշումներ կայացնել հետագա մասնագիտական ընտրության հարցում։
Comments
Post a Comment