Ապրիլի 21-ին մեկնարկել է ԿԶՆԱԿ հիմնադրամի կողմից իրականացվող «Իմ կյանքը համայնքում 5» աշակերտների փոխանակման ծրագիրը։
Ծրագրին մասնկցող բոլոր դպրոցները սիրով և ջերմությամբ են ընդունել դպրոց եկած աշակերտներին, նրանց ծնողներին և մանկավարժներին: Նրանց դիմավորել են աղ ու հացով, ծաղիկներով, ծանոթացրել են դպրոցին: Ուսումնական գործընթացից բացի բոլոր մասնակից դպրոցները պլանավորել են անցկացնել նաև ճանաչողական էքսկուրսիաներ:
Շատ դպրոցներ ծրագրին մասնակցում են արդեն 5-րդ անգամ:
Այս անգամ Նոր Հաճնի ավագ դպրոցը համագործակցում է Տավուշի մարզի Աչաջուր գյուղի միջնակարգ դպրոցի հետ։Դպրոցը հյուրընկալել է 10- րդ դասարանի սովորողներին: Ի նշան բարեկամության, դպրոցում կազմակերպել են ծառատունկ:
Արմավիրի մարզի Բաղրամյանի միջնակարգ դպրոցը հյուրընկալել է Աշտարակի Վարդգես Պետրոսյանի անվան հիմնական դպրոցի աշակերտներն՝ նրանց դիմավորել են որպես թանկագին հյուրերի:
Հետաքրքիր առաջարկ է արել Ծաղկաձորի միջնակարգ դպրոցի տնօրենը. ապրիլի 25-ին նա հրավիրում է Թեղենիսի լանջին կենդանի նվագակգությամբ շուրջպար բռնելու՝ ի պատիվ իրենց դպրոց եկած աշակերտների: Ի դեպ, դպրոցի տնօրենը հրավիրում է նաև ծրագրին մասնակից մյուս դպրոցների աշակերտներին և մանկավարժներին ևս:
Տավուշի մարզի Կայանի միջնակարգ դպրոցը կրթաճանաչողական էքսկուրսիա է կազմակերպել դեպի Մակարավանք, հյուրերին մանրամասն ծանոթացրել են վանքի պատմությանը։
Կոտայքի մարզի Կապուտանի միջնակարգ դպրոցը հյուրընկած երեխաների համար կազմակերպել է էքսկուրսիա դեպի Գեղարդ և Գառնի:
Աբովյանի թիվ 2 հիմնական դպրոցը ծրագրին մասնակցում է 5-րդ անգամ, դպրոցի տնօրենն իր հայրենասիրությամբ վարակել է մասնակից շատ դպրոցների, պարոն Տաշչյանը սիրով ընդունում է տարբեր մարզերից եկած աշակերտներին և իրենց սովորողներին էլ ուղարկում է սահմանամերձ Տաթև, Խոտ համայնքներ: Այս դպրոցից 19 աշակերտ մեկնել է 8 մարզերի 11 դպրոցներ, իսկ ընդունել են 5 մարզերի 6 դպրոցներից 13 աշակերտ։
Comments
Post a Comment