Շարունակվում են 2024-25 ուստարվա օգոստոսյան խորհրդակցությունները։ Օգոստոսի 20-ին Լոռու մարզի Վանաձորի հ․7 հիմնական դպրոցի տարբեր լսարաններում ԿԶՆԱԿ հիմնադրամի մի խումբ մասնագետներ տնօրենի տեղակալների և մեթոդմիավորման նախագահների համար պատրաստել էին նոր ուստարվա անելիքների փաթեթ, որոնք ներկայացվեցին առանձին-առանձին, որից հետո պատասխանեցին դպրոցների ներկայացուցիչների բազմապիսի հարցերին։ Տնօրենի տեղակալների առջև բացման խոսքով հանդես եկավ ԿԶՆԱԿ-ի տնօրենի ժամանակավոր պաշտոնակատար Արտաշես Թորոսյանը, որը շնորհավորեց բոլորին, ներկայացրեց ուսպլանի ձևավորման կարևոր դրույթները, ներքին վերահսկողության մեխանիզմների ներդրման շեշտադրումները։
Հանրակրթության պետական չափորոշչի և ուսումնական ծրագրերի բաժնի մասնագետները խոսեցին ՀՊՉ-ի եռամյա ներդրման ձեռքբերումների և դժվարությունների մասին, ուղենշեցին դպրոցների անելիքները։ Գնահատման բաժնի մասնագետները ներկայացրին գնահատման մեթոդաբանությունը, խոսեցին գնահատման տեսակների և նրանց կիրառման պարբերականության, հնարների և թյուրըմբռնումների մասին, պատասխանեցին տնօրենի տեղակալների բարձրացրած հարցերին։
Խորհրդակցություններին ակտիվորեն մասնակցում էին նաև ՆՈՒՀ-երի մեթոդիստները, որոնց առջև հանդես եկավ ՀՊՉ-ի և ուսումնական ծրագրերի բաժնի մասնագետ Անահիտ Վիրաբյանը։ Նա խոսեց ՆՈՒՀ-երում չափորոշչի և ծրագրերի ներդրման, մենթորական վերապատրաստումների, ՆՈՒՀ-երում ներդրվող գնահատման համակարգի մասին։
ԿԶՆԱԿ-ը բոլոր ներկաների համար պատրաստել էր քյուարկոդերով աշխատող էջանշաններ, որտեղ զետեղված էին հանրակրթական դպրոցներին և ՆՈՒՀ-երի անհրաժեշտ բոլոր փաստաթղթերը, ուսումնական նյութերը, ուղերձները և տեսաձայնագրություններ։
Այցելությունները ընթացքի մեջ են, և հանդիպում-քննարկումներ են լինելու ՀՀ բոլոր մարզերում։
Հաջորդ հանդիպումը տեղի կունենա օգոստոսի 21-ին Շիրակի մարզում։
Comments
Post a Comment