Օգոստոսյան խորհրդակցություններ Շիրակի մարզում

Նոր ուսումնական տարվան ընդառաջ  օգոստոսի 21-ին Շիրակի մարզի Գյումրու հ․20 հիմնական դպրոցում տեղի ունեցավ 2024-25 ուստարվա օգոստոսյան խորհրդակցությունը։ Խորհրդակցությանը մասնակցում էին Շիրակի մարզի շուրջ 145 ուսումնական հաստատությունների տնօրենի տեղակալներ և մեթոդմիավորման նախագահներ։

ԿԶՆԱԿ հիմնադրամի մի խումբ մասնագետներ տնօրենի տեղակալների և մեթոդմիավորման նախագահների համար պատրաստել էին նոր ուստարվա անելիքների փաթեթ, որը ներկայացվեց լսարանին, որից հետո խոսնակները պատասխանեցին դպրոցների ներկայացուցիչների բազմապիսի հարցերին։ Տնօրենի տեղակալների առջև բացման խոսքով հանդես եկավ ԿԶՆԱԿ-ի տնօրենի ժամանակավոր պաշտոնակատար Արտաշես Թորոսյանը, որը շնորհավորեց բոլորին, ներկայացրեց ուսպլանի ձևավորման կարևոր դրույթները, ներքին վերահսկողության մեխանիզմների ներդրման շեշտադրումները։  

Հանրակրթության պետական չափորոշչի և ուսումնական ծրագրերի բաժնի մասնագետները խոսեցին ՀՊՉ-ի եռամյա ներդրման ձեռքբերումների և դժվարությունների մասին, ուղենշեցին դպրոցների անելիքները։ Գնահատման բաժնի մասնագետները խոսեցին գնահատման մեթոդաբանության, տեսակների և նրանց կիրառման պարբերականության, հնարների և թյուրըմբռնումների մասին, պատասխանեցին տնօրենի տեղակալների բարձրացրած հարցերին։

Խորհրդակցություններին ակտիվորեն մասնակցում էին  նաև ՆՈՒՀ-երի մեթոդիստները, որոնց առջև հանդես եկավ ՀՊՉ-ի և ուսումնական ծրագրերի բաժնի մասնագետ Անահիտ Վիրաբյանը։ Նա խոսեց ՆՈՒՀ-երում չափորոշչի և ծրագրերի ներդրման, մենթորական վերապատրաստումների, ՆՈՒՀ-երում ներդրվող գնահատման համակարգի մասին։

ԿԶՆԱԿ-ը բոլոր ներկաների համար պատրաստել էր քյուարկոդերով աշխատող էջանշաններ, որտեղ զետեղված էին հանրակրթական դպրոցներին և ՆՈՒՀ-երի անհրաժեշտ բոլոր փաստաթղթերը, ուսումնական նյութերը, ուղերձները և տեսաձայնագրություններ։ 