«Ներդպրոցական վերահսկողություն(ՆԴՎ), Ուսպլան, Չափորոշչի պահանջների կատարումը ՆԴՎ-ի միջոցով» թեմայով առկա սեմինար Արագածոտնի մարզում

Ս․թ․ նոյեմբերի 26-ին  ՀՀ  Արագածոտնի մարզի Աշտարակի տարածաշրջանի  տնօրենների  հետ  առկա ձևաչափով իրականացվեց «Ներդպրոցական վերահսկողություն(ՆԴՎ),  Ուսպլան,  Չափորոշչի պահանջների կատարումը ՆԴՎ-ի միջոցով» թեմաներով  սեմինար։ 

ԿԶՆԱԿ հիմնադրամի տնօրեն Ա․ Թորոսյանը, խոսեց ներդպրոցական վերահսկողության կարևորության մասին որպես  դպրոցում իրականացվող ներքին գնահատման և վերահսկման գործընթաց՝  շեշտադրելով  կրթական որակի բարելավումն ու ուսուցման գործընթացի արդյունավետության բարձրացումը։ 

Ընդգծելով տնօրենների դերը ՆԴՎ-ի իրականացման գործընթացում՝ առաջարկեց մշտադիտարկման միջոցով իրականացնել ընդհանուր առաջադիմության և ուսումնական գործընթացի արդյունավետության պարբերական ստուգում,  խնդիրների հայտնաբերում և ժամանակին միջոցառումների ձեռնարկում՝ դրանց լուծման ուղղությամբ:  

Հանրակրթական ուսումնական հաստատությունների կառավարման աջակցության բաժնի մասնագետ  Ա. Հովսեփյանը ներկայացրեց  հանրակրթական ուսումնական հաստատությունների 2024-2025 ուսումնական տարվա առաջին կիսամյակի ուսումնական պլանների մշակման և ԴԿՏ համակարգ ներբեռնման հետ կապված խնդիրները։  Տնօրեններին ներկայացրեց դպրոցների կողմից մշակված 2024-2025 ուսումնական տարվա ուսումնական պլանների կազմման հետ կապված հիմնական թերությունները՝ ըստ ուսումնական պլանի պետական պարտադիր դպրոցական և անհատական բաղադրիչների։ Վերլուծեց ուսումնական հաստատությունների կողմից թույլ տրված հիմնական սխալները, դրանց պատճառները։

Առանձին անդրադարձ  կատարեց 10-րդ դասարանի ուսումնական պլաններում արձանագրված խնդիրներին։ Խոսեց  առանձին գործող ավագ դպրոցների 11-12-րդ դասարանների ուսպլանների թերությունների մասին։  Ներկայացրեց  2024-2025 ուսումնական տարվա երկրորդ կիսամյակում մշակվող ուսումնական պլաններում առաջին կիսամյակում մշակված ուսպլանների թերություններից խուսափելու մոտեցումները։ 

Հանրակրության պետական չափորոշչի և ուսումնական ծրագրերի բաժնի ՀՊՉ մասնագետ Լ․ Զոհրաբյանը և Ռ․ Կոստանյանը  ներկայացրեցին «Հանրակրթության պետական չափորոշչի պահանջների կատարումը    ՆԴՎ-ի միջոցով» թեման։ Կարևորելով կարողունակահեն կրթությունը՝ մասնակիցներին ծանոթացրեցին հանրակրթության պետական չափորոշչի(ՀՊՉ) պահանջների կատարումը ապահովելու   համար կիրառվող ներդպրոցական վերահսկողության մեթոդներին ու գործիքներին: Ներկայացրեցին  համակարգված մոտեցումներ, որոնք կաջակցեն  հանրակրթական ուսումնական հաստատությունների տնօրեններին ճիշտ պլանավորել և իրականացնել վերահսկողության գործընթացներ՝ հիմնվելով դպրոցի արդեն վեր հանված կարիքների վրա։ Շեշտադրեցին  կրթական յուրաքանչյուր աստիճանում համագործակցային միջավայրի ձևավորման կարևորությունը՝ ժողովրդավար մոտեցումներով ՀՊՉ պահանջների կատարումն ապահովելու համար։