«Մեր ներկան ու ապագան» հոբելյանական համերգ նվիրված Երևանի Արմեն Տիգրանյանի անվան երաժշտական դպրոցի հիմնադրման 75 - ամյակին
Սույն թվականի հունիսի 4-ին Երևանի «Առնո Բաբաջանյան» համերգասրահում տեղի ունեցավ Երևանի Արմեն Տիգրանյանի անվան երաժշտական դպրոցի տարեվերջյան հաշվետու համերգը, որը նվիրված էր դպրոցի հիմնադրման 75 - ամյակին։ Համերգը ներկայացված էր հետաքրքիր խորագրով, այն է ՝ «Մեր ներկան և ապագան», ինչը և հպարտանալու առիթ էր ընձեռում դպրոցին՝ իր անցած հարուստ և բեղուն ուղին ներկայացնելու գործում, և նաև պարտավորեցնող էր, քանի որ անելիքներ դեռ շատ կան։
Հոբելյանական երեկոյին այլ բարձրաստիճան հյուրերի հետ մեկտեղ հրավիրված էին նաև ԿԳՄՍ նախարարության Կրթության զարգացման և նորարարությունների ազգային կենտրոն հիմնադրամի ներկայացուցիչները՝ ի դեմս տնօրենի ժ/պ, պ․ Արտաշես Թորոսյանի, Ուսուցիչների մասնագիտական զարգացման բաժնի երաժշտության մասնագետ Գայանե Թադևոսյանի և ՀՊՉ ՈՒԾ բաժնի բնագիտական առարկաների մասնագետ Կարինե Ավետիսյանի։ Երեկոյին ներկա էր նաև դպրոցի բազում տարիների նախկին տնօրեն պ․ Ֆելիքս Մուրադյանը։
Համերգին իրենց կատարողական բարձր արվեստով հանդես եկան դպրոցի տարբեր դասարանների և մասնագիտությունների սաները։ Ելույթ ունեցան նաև դպրոցում գործող տարբեր խմբերը՝ փողային, ժողգործիքների ջութակահարների, կամերային և այլն: Դեռևս 1950 թվականից իր գործունեության դժվար ուղին դպրոցը հարթել է իր շնորհաշատ սաների միջոցով՝ մեր երկրին և աշխարհին տալով բազում հայտնի երաժիշտներ, կոմպոզիտորներ և երաժշտական արվեստի այլ գործիչներ։ Այսօր էլ դպրոցում իրենց կյանքի ուղին փորձում են նախանշել դպրոցի 800-ից ավելի սաները։
Երեկոյին երախտիքի խոսքով հանդես եկավ դպրոցի տնօրեն Անահիտ Գևորգյանը, որը դեռևս 2011 թվականից պատվով իրականացնում է իր առաքելությունը։ 2025 թվականին կարևորագույն ձեռքբերումներից մեկը դպրոցի համար այն էր, որ Երևանի քաղաքապետարանի կողմից կազմակերպված «Երևանի արվեստների և երաժշտական դպրոցների» 16-րդ մրցույթ - փառատոնում Ա․ Տիգրանյանի անվան երաժշտական դպրոցը զ բաղեցրել էր երկրորդ հորիզոնականը։
Մաղթում ենք նորանոր ձեռքբերումներ։
ԿԶՆԱԿ հիմնադրամի ՈՒՄԶ բաժնի
մասնագետ՝ Գ․ Թադևոսյան
Comments
Post a Comment