Տնօրենի դերը ուսումնադաստիրակչական աշխատանքների տարեկան պլանավորման գործընթացում
Դպրոցի զարգացման և կայուն առաջընթացի հիմքում դրված է
կառավարման արդյունավետությունը։ Այս համատեքստում դպրոցի տնօրենի պլանավորման
կարողությունները առանցքային նշանակություն ունեն։ Տնօրենը պետք է կարողանա ոչ
միայն ձևակերպել դպրոցի երկարաժամկետ ռազմավարական զարգացման ուղղությունները,
այլև ապահովել այդ ուղղությունների հետևողական և համակարգված իրականացումը՝
ուսումնական հինգ տարիների ընթացքում։
Հատուկ ուշադրություն պետք է դարձվի նրան, որ
յուրաքանչյուր ուսումնական տարվա ուսումնադաստիրակչական աշխատանքների տարեկան
պլանը չմշակվի որպես ձևական փաստաթուղթ, այլ իրականում ծառայի որպես գործնական
ուղեցույց դպրոցի ամբողջ կոլեկտիվի համար։ Տարեկան պլանում անհրաժեշտ է հստակ
արտացոլել դպրոցի զարգացման ծրագրում նախատեսված գործողությունների այդ տարվա
բաժինը՝ համապատասխանեցնելով այն դպրոցի ռեսուրսներին, հնարավորություններին և
համայնքի ակնկալիքներին։
Միևնույն ժամանակ, հանրակրթության պետական չափորոշչի
ներդրումն ու արդյունավետ իրականացումը պետք է տեղ գտնեն տարեկան պլանի
առանցքային ուղղություններում։ Չափորոշչի պահանջների կյանքի կոչումը ենթադրում է
համակարգված աշխատանքներ՝ թե՛ մանկավարժական կազմի կարողությունների զարգացման,
թե՛ ուսումնական ծրագրերի և մեթոդների արդիականացման ուղղությամբ։
Տարեկան պլանավորման գործընթացում կարևոր է ապահովել՝
- ռազմավարական ծրագրի քայլային իրականացման
տրամաբանությունը,
- փոփոխությունների ներդրման համակարգվածությունը,
- գնահատման մեխանիզմների կիրառումը և
- ուսումնական գործընթացի վերահսկելիությունը։
Եզրափակելով՝ տնօրենի կառավարման արդյունավետությունը
մեծապես պայմանավորված է նրա պլանավորման հմտություններով։ Ուստի կրթական
ղեկավարները պետք է պլանավորումը դիտարկեն որպես ռազմավարական գործիք՝ ուղղված ոչ
միայն ընթացիկ աշխատանքների կազմակերպմանը, այլ նաև դպրոցի որակական
փոփոխություններին և շարունակական զարգացմանը։
Հունիս ամսվանից սկսած ԿԶՆԱԿ-ի փորձագետները օգնելու են
դպրոցների տնօրեններին մշակել դպրոցի ՈՒԴԱՏՊ-ը։ Պլանը մշակելու համար ԿԶՆԱԿ-ի
մասնագետները մշակել են ՈՒԴԱՏՊ-ի կառուցվածքը և մշակել են օրինակելի նմուշ։ ՈՒԴԱՏՊ-ի
բոլոր գործողություններին համապատասխան ԿԶՆԱԿ-ը օգոստոս ամսին կազմակերպելու է
վերապատրաստողների վերապատրաստում այնպես, որ դրանց մասնակցած ուսուցիչները կարողանան
սեպտեմբեր և հոկտեմբեր ամիսներին նման սեմիանրներ կազմակերպել իրենց դպրոցներում։
Հոկտեմբեր ամսին կազմակերպելու են վերապատրաստողների վերապատրաստում այն
թեմաներով, որոնք առնչվում են նոյեմբեր և դեկտեմբերի ամիսների աշխատանքներին։ Նման
ձևով աշխատելու ենք նաև երկրորդ կիսամյակում։
Շատ կարևոր է, որ դպրոցները այդ վերապատրաստումներին
մասնակից դարձնեն ոչ թե նույն ուսուցիչներին, այլ հնարավորինս շատ ուսուցիչներ։
Նրանք առաջին և երկրորդ կիսամյակաների ընթացքում կիրականացնեն սեմինարներ իրենց դպրոցներում
ավելի քան մեկ անգամա, կլինեն մենթորներ դպրոցի այն ուսուցիչների համար, ովքեր
իրականացման ընթացքում կունենան դժվարություններ։
ԿԶՆԱԿ-ի և ԿՏԱԿ-ի համագործակցությամբ ԴԿՏ համակարգում (emis) ստեղծվել է ՈՒԴԱՏՊ-ի ներմուծման և վարման էլեկտրոնային
համակարգ, որը էականորեն կպարզեցնի ՈՒԴԱՏՊ-ի կատարումը։ Ավանդաբար նման
փոփոխությունների նկատմամբ թղթաբանության ավելացման դժգոհություննրը կանխելու
համար նշում եմ, որ ՈՒԴԱՏՊ-ի կատարողականը արձանադրվում է մեթոդմիավորումների և
մանկավարժական խորհուրդների արձանագրություններում և լրացուցիչ արձանագրություններ
չեն նախատեսվում։
Comments
Post a Comment