«ՖԻԼՄ,ՖԻԼՄ, ՖԻԼՄ» ՖԻԼՄԱՍՏԵՂԾՄԱՆ ՀԱՆՐԱՊԵՏԱԿԱՆ ԴՊՐՈՑԱԿԱՆ ՆԱԽԱԳԾԻ ՄԵԿՆԱՐԿ

Հարգելի՛գործընկերներ,

Սիրով տեղեկացնում ենք, որ մեկնարկում է «Ֆիլմ, ֆիլմ, ֆիլմ» ֆիլմաստեղծման հանրապետական նորարարական դպրոցական նախագիծը, որը նպատակ ունի համադրել կրթությունը, արվեստը և տեխնոլոգիան՝ ստեղծելով ինքնատիպ ուսումնական միջավայր: Այն հնարավորություն է տալիս զարգացնելու սովորողների՝ 21-րդ դարի առանցքային հմտությունները, ինչպիսիք են՝ քննադատական և ստեղծագործական մտածողությունը, համագործակցությունը, ինքնաճանաչողությունը, թվային և մեդիագրագիտությունը: Արդյունքում՝ սովորողները դառնում են ավելի մրցունակ և պատրաստակամ՝ դիմակայելու ապագայի մարտահրավերներին:

Մանրամասներին ծանոթացեք՝ ստորև ներկայացված կանոնակարգում։

Ակնկալում ենք ձեր ակտիվ մասնակցությունը։

 ԿԶՆԱԿ հիմնադրամ

Ուսուցիչների մասնագիտական զարգացման բաժին

Համակարգող՝ Սիրինե Կոսյան

ԿԱՆՈՆԱԿԱՐԳ 

«ՖԻԼՄ, ՖԻԼՄ, ՖԻԼՄ» ՖԻԼՄԱՍՏԵՂԾՄԱՆ ՀԱՆՐԱՊԵՏԱԿԱՆ 

ԴՊՐՈՑԱԿԱՆ ՆԱԽԱԳԾԻ  

 

Նախագիծը հանդիսանում է կրթական նորարարական մոդել, քանի որ այն հաջողությամբ համադրում է կրթությունը, արվեստը և տեխնոլոգիան՝ ստեղծելով ինքնատիպ ուսումնական միջավայր: Այն հնարավորություն է տալիս զարգացնելու սովորողների՝ 21-րդ դարի առանցքային հմտությունները, ինչպիսիք են՝ քննադատական և ստեղծագործական մտածողությունը, համագործակցությունը, ինքնաճանաչողությունը, թվային և մեդիագրագիտությունը: Արդյունքում՝ սովորողները դառնում են ավելի մրցունակ և պատրաստակամ՝ դիմակայելու ապագայի մարտահրավերներին: 

 

Նպատակներ 

• Զարգացնել սովորողների ստեղծագործական և քննադատական մտածողությունը։ 

• Սովորողների մոտ ձևավորել համագործակցելու և թիմային աշխատանքի կարողություններ։  

• Սովորողների մոտ ձևավորել ճիշտ որոշումներ կայացնելու և խնդիրներ լուծելու հմտություններ։ 

• Նպաստել սովորողների լեզվական գրագիտության, սովորել սովորելու, ինքնաճանաչողական և սոցիալական, թվային և մեդիագրագիտության, մշակութային, մաթեմատիկական ու գիտատեխնիկական կարողունակությունների ձևավորմանն ու զարգացմանը՝ ֆիլմ պատրաստելու միջոցով։ 

 

Խնդիրներ 

• Ծանոթացնել ֆիլմարտադրությանն անհրաժեշտ թվային գործիքներին՝ խթանելով սովորողների հետաքրքրությունը կինոարվեստի նկատմամբ՝ որպես արվեստի և ինքնարտահայտման միջոց։ 

• Ստեղծել ֆիլմեր, որոնք բխում եմ սովորողների առօրյա կյանքից և հասարարակական պահանջներից։ 

• Կազմակերպել միջոցառումներ, որոնք կմիավորեն սովորողներին, ուսուցիչներին և ծնողներին ստեղծագործական և հետաքրքիր նախագծերի շուրջ՝ հնարավորություն տալով նրանց ներկայացնել իրենց ստեղծագործական ներուժը: 

 

Վերջնարդյունքներ 

• Սովորողները կունենան պատկերացում ֆիլմարտադրության,  ներառյալ՝ սցենարային կառուցվածքի, ռեժիսուրայի, օպերատորական լուծումների, մոնտաժի և ձայնային ձևավորման վերաբերյալ։ 

• Սովորողները ձեռք կբերեն մեդիագրագիտության հմտություններ, որոնք կօգնեն քննադատորեն վերլուծել ու ստեղծել ցանկացած բովանդակություն՝ ցուցաբերելով պատասխանատվություն և գեղագիտական մոտեցում։ 

• Կզարգանա սովորողների ստեղծագործական մտածողությունն ու գեղարվեստական ճաշակը, ի հայտ կգան ինքնարտահայտման նոր միջոցներ։ 

• Մասնակիցները կսովորեն աշխատել թիմում, կբարելավեն համագործակցության, և հաղորդակցման հմտությունները, կբարձրանա սովորողների ինքնավստահությունը՝ սեփական գաղափարները կյանքի կոչելու և հանրային ներկայացման միջոցով։ 

• Նախագծի արդյունքում սովորողների կողմից կստեղծվեն կարճամետրաժ ֆիլմեր, որոնք կարտահայտեն նրանց մտահղացումները, խնդիրների ընկալումը և ստեղծագործական մոտեցումները։ 

 

 Նախագծի բովանդակությունը 

 

Նախագծի իրականացման համար առանձնացվել են թեմաներ և/կամ ուղղություններ, որոնք կարող են հարմարեցվել և մշակվել ըստ սովորողների հետաքրքրությունների և  հմտությունների՝ ֆիլմի ստեղծման գործընթացը դարձնելով ուսուցանող, մոտիվացնող և զվարճալի: 

 

 

1. 1) Ընկերություն և հարաբերություններ 

2. Այս ուղղությունը շեշտադրում է մարդկային հարաբերությունների, փոխադարձ հարգանքի և համագործակցության կարևորությունը։ Սովորողները կքննարկեն, թե ինչպես ճանաչել իսկական ընկերներին, ինչպես հաղթահարել հարաբերությունների դժվարությունները, կոնֆլիկտները և ինչպես միասին աշխատել՝ ընդհանուր նպատակների հասնելու համար։ Կարևորվում է նաև ներողամտության և փոխզիջման դերը՝ հարաբերություններում ծագած վեճերը հանգուցալուծելու գործում։

2. 2) Անվտանգ և ապահով կրթական միջավայր 

Այս ուղղությունը շեշտադրում է, որ սովորելը կարող է լինել ոչ միայն պարտականություն, այլև հետաքրքիր ու զվարճալի գործընթաց։ Թեման նվիրված է դպրոցական առօրյային և ուսումնական գործընթացին՝ ընդգծելով, որ դրա համար առաջնային է անվտանգ և ապահով կրթական միջավայրի ձևավորումը, որը զերծ է բռնություններից և բուլինգից։ Նախագիծը կքննարկի այնպիսի հարցեր, ինչպիսիք են՝ ինչպես նոր միջավայրում հայտնվելը կարող է բացահայտել նոր հնարավորություններ, և ինչպես է աշակերտի մոտեցումը դասերին փոխվում՝ ապահով ու անվտանգ միջավայրի շնորհիվ։ 

 

3.  3) Ընտանեկան արժեքներ 

Այս ուղղության շրջանակում պետք է անդրադառնալ ընտանիքի՝ որպես մարդու կյանքի հիմնաքարի կարևորությանը։ Կքննարկվեն այնպիսի հարցեր, ինչպիսիք են՝ ինչպես աջակցել ընտանիքի անդամներին դժվար պահերին, ինչպես են ընտանեկան արժեքներն ազդում անձի որոշումների վրա, և ինչպես են, օրինակ, տատիկի կամ պապիկի հետ կապված հիշարժան պատմությունները սերունդներին փոխանցում արժեքներ։ 

 

4. 4) Սոցիալական թեմաներ  

Թեման կենտրոնացած է հասարակական խնդիրների և քաղաքացիական պատասխանատվության վրա։ Սովորողները կբացահայտեն, թե ինչպես կարելի է հաղթահարել տեխնոլոգիաների գերօգտագործման հետևանքները, և ինչպես մեկ անձը կարող է փոխել իր համայնքը։ Կարևորվում է նաև համատեղ աշխատանքը՝ համայնքի մշակույթը, արժեքներն ու գեղեցկությունը պահպանելու և զարգացնելու նպատակով։ 

 

5. 5) Բնապահպանական թեմաներ  

Թեման կենտրոնանում է կանաչ կրթության և շրջակա միջավայրի պահպանմանն առնչվող գլոբալ ու տեղական խնդիրների վրա։ Աշակերտները կուսումնասիրեն կլիմայի փոփոխությունները, կսովորեն թափոնների նվազեցման և վերամշակման կարևորությունը, ինչպես նաև կբացահայտեն ջրի ռեսուրսների պահպանման և կենսաբազմազանության խնդիրները։ Այս թեմաները կձևավորեն բնապահպանական գիտակցություն։ 

 

6. 6) Անձնական աճ և ինքնաբացահայտում 

Այս ուղղությունը նպատակ ունի ոգեշնչել սովորւողներին՝ հավատալու իրենց սեփական ուժերին ։ Կքննարկվեն, թե ինչպես կրթությունը կարող է փոխել ապագան, ինչպես կարելի է  հաղթահարել վախերը։ Կարևորվում է այն գաղափարը, որ մեկ մարդ իր նախաձեռնողականությամբ և արժեքներով կարող է փոխել շրջակա աշխարհը, համայնքը, մարդկանց և ոգեշնչել մյուսներին։ 

 

7.  7) Արկածային և ֆանտաստիկ թեմաներ 

Թեման ուղղված է սովորողտների ստեղծագործական մտածողության զարգացմանը։ Մասնակիցները կկարողանան ստեղծել պատմություններ մի կախարդական կամ անսովոր վայրում, որտեղ հերոսները պատահաբար հայտնվում են անցյալում կամ ապագայում։ Կարևոր է նաև այն գաղափարը, թե ինչպես է հերոսի հանդիպումը մի արտասովոր էակի հետ օգնում նրան բացահայտումներ անել և փոխել իր կյանքը։ 

 

8. 8) Մոտիվացիոն և ուսուցողական թեմաներ 

Այս շեշտադրում է ինքնավստահության և համառության կարևորությունը կյանքում։ Կքննարկվեն այնպիսի գաղափարներ, ինչպիսիք են՝ ինչպես ինքնավստահությունը և համառությունը կարող են հաղթանակ բերել, ինչպիսին են երեխաների տեսլականները իրենց ապագայի վերաբերյալ, և ինչպես փոքր նախաձեռնությունները կարող ունենալ մեծ ազդեցություն հասարակության վրա։ Թեման ուղղված է մասնակիցներին դրդելու դառնալ հասարակության փոփոխության կրողներ։ 

 

Նախագծի անցկացման փուլերն ու ժամկետները 

Նախագիծն իրականացվում է երեք փուլով՝ երկուսը՝ մրցութային, մեկը՝ փառատոնային։ 

 

Առաջին փուլ (դպրոցական)։ Յուրաքանչյուր ուսումնական հաստատություն իրականացնում է մրցույթ, որի արդյունքում ընտրում և ներկայացնում է մենթոր դպրոցին 1 հաղթող աշխատանք՝ ֆիլմ (վերջնաժամկետ՝ 10-ը դեկտեմբերի 2025թ.): 

 

Երկրորդ փուլ (մենթոր դպրոց)։ Մրցութային երկրորդ փուլն իրականացնում է մենթոր դպրոցը։ Փորձագիտական հանձնաժողովը (նախապես ձևավորվում է մենթոր դպրոցը, որի կազմի մեջ կարող են ընդգրկվել կրթության շահառուներ՝ վարչության մասնագետներ, տնօրեններ, ուսուցիչներ, ծնողներ, լրատվամիջոցների ներկայացուցիչներ, բիզնես ոլորտի ներկայացուցիչներ և սովորողներ), որը դպրոցների կողմից ներկայացված ֆիլմերից ընտրում է լավագույն 2 ֆիլմ և ուղարկում ԿԶՆԱԿ հիմնադրամ՝ եզրափակիչ փուլին  մասնակցելու համար (վերջնաժամկետ՝ 15-ը փետրվարի, 2026թ.): 

 

Եզրափակիչ փուլ՝ ֆիլմերի դիտման փառատոն։ Կազմակերպում է ԿԶՆԱԿ հիմնադրամը, որին մասնակցում են բոլոր մենթոր դպրոցների կողմից հաղթող ճանաչված ֆիլմերը (վերջնաժամկետ՝ ապրիլ- մայիս, 2026թ.): 

 

Նախագծի ընթացքը և ներկայացման ձևաչափը 

• Ընտրել վերոնշյալ թեմաներից առնվազն մեկը: 

• Հետևելով սեմինարների ժամանակ տրամադրված մասնագիտական խորհուրդներին՝ ստեղծել 3 րոպե տևողությամբ ֆիլմ՝ ընտրված թեմայով։ 

• Ֆիլմը ներբեռնել YouTube՝ վերնագրի կողքին նշելով ԿԶՆԱԿ «Ֆիլմ, ֆիլմ, ֆիլմ»։ 

• Կիսվել դպրոցի էջում՝ հեշթեգով նշելով ԿԶՆԱԿ հիմնադրամին և ՀՀ ԿԳՄՍ նախարարությանը։ 

• Առաջին՝ մրցութային փուլում հաղթող ճանաչված ֆիլմի հղումը պետք է ուղարկել մենթոր դպրոցին։ 

• Մենթոր դպրոցը սահմանված ձևաչափով կազմակերպում և իրականացնում է երկրորդ փուլը և հաղթող 2 ֆիլմերի յութուբյան հղումները ուղարկում ԿԶՆԱԿ հիմնադրամ, լրացնելով հետևյալ հայտը  (յուրաքանչյուր աշխատանքի համար՝ առանձին)։  

• Երկու մրցութային փուլերը հաղթահարելուց հետո ֆիլմը ներկայացվում է եզրափակիչ հանրապետական փառատոնին դիտման համար։ 

 

 Խորհրդատվական սեմինարներ 

• Նախագծի վերաբերյալ իրականացվելու են խորհրդատվական սեմինարներ ԿԶՆԱԿ հիմնադրամի կողմից, որին մասնակցելու համար հայտագրվել՝ մինչև սեպտեմբերի 22-ը, հետևյալ հղումով։ 

• Սեմինարները կանցկացվեն պարբերաբար և նախագծի ընթացքի տարբեր փուլերում՝ նպատակ ունենալով աջակցել մասնակիցներին ֆիլմի ստեղծման գործընթացում։ 

• Սեմինարների թեմաների և անցկացման ժամանակացույցի մասին հավելյալ տեղեկատվություն կտրվի հայտագրված մասնակիցներին՝ հաղորդակցման համար ընտրված «Թիմս» հարթակի միջոցով։ 

ԿԶՆԱԿ հիմնադրամ 

Ուսուցիչների մասնագիտական զարգացման բաժին