Իրականացվեց ԿԶՆԱԿ հիմնադրամի «Իմ կյանքը համայնքում-8» ծրագրի ամփոփիչ միջոցառումը

Նոյեմբերի 28-ին Շիրակի մարզի Գյումրու թիվ 41 հիմնական դպրոցում տեղի ունեցավ «Իմ կյանքը համայնքում-8» ծրագրի ամփոփիչ միջոցառումը։ Ծրագիրը մեկնարկել էր հոկտեմբերի 13-ին և շարունակվել մինչև 19-ը՝ ներգրավելով Երևանի և Հայաստանի բոլոր մարզերի 27 դպրոցների 80 սովորողների, այդ թվում՝ սահմանամերձ համայնքներից։ 

Ծրագրի առանցքում հայրենաճանաչությունն էր՝ նպատակ ունենալով խթանել սովորողների տեղանքի, մշակույթի, պատմության և ավանդույթների ճանաչումն ու ուսումնասիրությունը։ Մեկ շաբաթվա ընթացքում ծրագրի մասնակիցները հյուրընկալվել էին տարբեր համայնքներում, շարունակել ուսումը տեղի դպրոցներում և ապրել հյուրընկալ ընտանիքներում՝ խորը ճանաչելով համայնքային կյանքը։ 

Ամփոփիչ միջոցառմանը մասնակցում էին ԿԶՆԱԿ հիմնադրամի տնօրեն Ժաննա Հարությունյանը, Շիրակի մարզպետի տեղակալ Արտուշ Հովհաննիսյանը,  հիմնադրամի մասնագետները, կրթության ոլորտի ներկայացուցիչներ, տնօրեններ, աշակերտներ, ծնողներ: 

ԿԶՆԱԿ հիմնադրամի գործադիր տնօրեն Ժաննա Հարությունյանը իր խոսքում ընդգծեց ծրագրի նշանակությունը՝ այն կարևորելով սովորողների սոցիալականացման, հայրենաճանաչության և արժեհամակարգի ձևավորման տեսանկյունից։ Նա շնորհակալություն հայտնեց ծրագրին մասնակցած բոլոր դպրոցներին, ինչպես նաև առանձնահատուկ շնորհակալություն ուղղեց միջոցառման հյուրընկալող Գյումրու թիվ 41 հիմնական դպրոցի տնօրեն Հայաստան Հովհաննիսյանին։ Ժաննա Հարությունյանը մասնակից դպրոցներին հանձնեց մասնակցության հավաստագրեր և ԿԶՆԱԿ հիմնադրամի կողմից տրամադրված խաղեր։ 

Միջոցառման ընթացքում դպրոցների սովորողները ներկայացան առանձին տաղավարներով՝ պատմելով իրենց տպավորությունների, համայնքային կյանքում մեկշաբաթյա ապրելու և սովորելու ընթացքում ձեռք բերած հմտությունների մասին։ Նրանք առանձնահատուկ կարևորեցին ինքնուրույնության, որոշումներ կայացնելու, ինքնակազմակերպման, ինքնաճանաչման, ինչպես նաև հայրենաճանաչության ու փոխադարձ հարգանքի ձևավորման կարևորությունը։  

Ամփոփիչ միջոցառումն ուղեկցվեց երաժշտական կատարումներով և ազգային երգերով, ինչպես նաև սովորողների կողմից «Իմ կյանքը համայնքում» ծրագրի հիմնի կատարմամբ։ 

 Ուսուցիչների մասնագիտական 

զարգացման բաժնի պետ՝ Ն․ Սիրականյան