ԿԶՆԱԿ հիմնադրամի և ՄԱԿ-ի Զարգացման ծրագրի համագործակցությամբ իրականացվեց ուսուցիչների վերապատրաստում կլիմայի փոփոխության կրթության վերաբերյալ

ԿԶՆԱԿ հիմնադրամի ուսուցիչների մասնագիտական զարգացման բաժինը, ՄԱԿ-ի Զարգացման ծրագրի (ՄԱԶԾ) հետ համագործակցությամբ, «Կլիմայական արկղիկ» (Climate Box) ծրագրի շրջանակում իրականացրել է առկա ձևաչափով մասնագիտական վերապատրաստման դասընթաց, որը նվիրված էր կլիմայի փոփոխության թեմային։  

Դասընթացին մասնակցելու համար Երևանի տարբեր դպրոցների 57 ուսուցիչներ ներկայացրել էին հայտեր՝ նախապես ստանալով պաշտոնական հրավեր իրենց կրթական հաստատությունների միջոցով։ Մասնակիցները վերապատրաստվել են հետաքրքրվածության և կամավորության հիման վրա՝ ձեռք բերելով նոր գիտելիքներ և գործնական հմտություններ կլիմայական կրթության վերաբերյալ։ 

Դասընթացի մասնակիցներին իր ողջույնի խոսքով հանդես եկավ ԿԶՆԱԿ հիմնադրամի գործադիր տնօրեն Ժաննա Հարությունյանը։ Նա կարևորեց ՄԱԶԾ հետ համագործակցության շրջանակում իրականացվող նմանատիպ  վերապատրաստումները՝ ընդգծելով, որ դրանք նպաստում են ուսուցիչների մասնագիտական կարողությունների զարգացմանը և կրթական գործընթացում կլիմայական թեմաների արդյունավետ ներդրմանը։ Ժ․Հարությունյւանը նաև իր երախտագիտությունը հայտնեց ՄԱԿ-ի Զարգացման ծրագրի ներկայացուցիչներին՝ ՀՀ դպրոցներին կրթական ռեսուրսներ տրամադրելու և դասընթացի իրականացմանն աջակցելու համար։ 

Իր խոսքում Ժ․Հարությունյանը հորդորեց ուսուցիչներին ակտիվորեն կիրառել տրամադրված ուսումնաօժանդակ նյութերը և նախաձեռնել կրթական նախագծեր՝ ուղղված կլիմայի փոփոխության թեմայի ուսումնասիրմանը և դպրոցներում այդ ուղղությամբ իրազեկվածության բարձրացմանը։ Նա ընդգծեց, որ նման նախագծային աշխատանքները լիովին համահունչ են և բխում են Հանրակրթության պետական չափորոշչի պահանջներից՝ նպաստելով աշակերտների կլիմայական գրագիտության, հետազոտական կարողությունների և պատասխանատու քաղաքացիական դիրքորոշման ձևավորմանը։ 

ՄԱԿ-ի Զարգացման ծրագրի «Կլիմայական արկղիկ» ծրագրի համակարգող Արմինե Պողոսյանը, իր ողջույնի խոսքում կարևորեց ուսուցիչների մասնակցությունը միջազգային կրթական նախաձեռնություններին։ Նա ընդգծեց, որ նման ծրագրերը լայն հարթակ են ուսուցիչների առաջընթացի համար, իսկ կլիմայական կրթության տարածումը դպրոցներում՝ կարևոր քայլ դեպի առավել կայուն ու իրազեկ ապագա։ 

Դասընթացի առանցքային հատվածում մասնակից ուսուցիչները հնարավորություն ունեցան լսելու կլիմայի փոփոխության ոլորտի առաջատար փորձագետների խոսքը։ ՄԱԿ-ի Զարգացման ծրագրի կլիմայի փոփոխության փորձագետ, ԿԶՆԱԿ հիմնադրամի ուսուցիչների մասնագիտական զարգացման բաժնի մասնագետ՝ Սիրինե Կոսյանը և ՄԱԿ-ի Զարգացման ծրագրի կլիմայի փոփոխության փորձագետ Արմինե Արշակյանը, ներկայացրին թեմայի արդիականությունն ու գլոբալ ազդակները՝ այն դիտարկելով նաև կրթության համատեքստում։ Փորձագետների հետ ինտերակտիվ քննարկումների ընթացքում ուսուցիչները ոչ միայն ծանոթացան կլիմայական մարտահրավերների էությանը, այլև կարևորեցին դրանց մասին կրթական աշխատանք սկսելու հրատապությունը։ 

Վերապատրաստման վերջում մասնակիցները նշեցին, որ նման դասընթացները կարևոր քայլ են՝ կլիմայական թեմաները դպրոցում գրագետ և արդյունավետ կերպով կիրառելու համար։ Ուսուցիչները ձեռք բերեցին նոր գիտելիքներ, գաղափարներ և մոտեցումներ՝ կլիմայի փոփոխության վերաբերյալ կրթական նյութեր մշակելու, դրանք դասապլաններում ներառելու և դասընթացը իրենց առարկաների ծրագրերում ներառարկայական կապերով ինտեգրելու համար։ 

ԿԶՆԱԿ հիմնադրամի և ՄԱԶԾ «Կլիմայական արկղիկ» ծրագրի համագործակցությունը շարունակում է աջակցել կրթության ոլորտին՝ խթանելով ուսուցիչների կարողունակության զարգացումը և կլիմայական գրագիտության տարածումը դպրոցներում։ 

Սիրինե Կոսյան 

Ուսուցիչների մասնագիտական զարգացման բաժին