«Կրթության զարգացման և նորարարությունների ազգային կենտրոն» հիմնադրամը և «Լոնդոն Այ միջազգային ուսումնական կենտրոն» ՍՊԸ-ն ստորագրեցին համագործակցության հուշագիր

Օրերս «Կրթության զարգացման և նորարարությունների ազգային կենտրոն» հիմնադրամի տնօրեն Ժաննա Հարությունյանը և «Լոնդոն Այ միջազգային ուսումնական կենտրոն» ՍՊԸ-ի տնօրեն Սերգեյ Քոչարյանը ստորագրեցին համագործակցության հուշագիր։ 

Հուշագրի նպատակն է աջակցել ՀՀ հանրակրթության ոլորտում իրականացվող բարեփոխումներին և ծրագրերին, խթանել փոխադարձ հետաքրքրվածության հիման վրա համագործակցության զարգացումը, ապահովել մասնագիտական փորձի փոխանակում և նպաստել կրթության որակի բարձրացմանը։ 

Համագործակցության շրջանակում նախատեսվում է՝ 

• կրթական ծրագրերի և ուսումնամեթոդական նյութերի շուրջ փորձի և գաղափարների փոխանակում, 

• համատեղ կրթական միջոցառումների իրականացում, 

• օտար լեզուների ուսուցման ժամանակակից միջազգային մեթոդների ներկայացում և տարածում, 

• ուսուցիչների մասնագիտական զարգացմանն ուղղված սեմինարների, վերապատրաստումների և վարպետության դասերի կազմակերպում։ 

Հանդիպման ընթացքում հիմնադրամի տնօրեն Ժաննա Հարությունյանը ընդգծեց, որ երկու կառույցների առաջատար մասնագետների և փորձագետների ներգրավմամբ համագործակցությունը կնպաստի հանրակրթական ուսումնական հաստատություններում դասավանդողների մասնագիտական կարողությունների շարունակական զարգացմանն ու կատարելագործմանը։ 

Հուշագրի ստորագրումը կողմերի կողմից հանդիսանում է փոխըմբռնման և արդյունավետ համագործակցության պատրաստակամության հաստատում։