Կրթության որակի նոր հորիզոններ ՄԿՈՒ ոլորտում

Հայաստանի կրթական համակարգը կանգնած է էական փոփոխությունների շրջանում․ աշխատաշուկան փոխվում է, տեխնոլոգիաները վերաձևակերպում են մասնագիտությունները, իսկ երիտասարդների ակնկալիքները կրթությունից, դառնում են ավելի պահանջկոտ։ Այս համատեքստում Եվրոպական կրթական հիմնադրամի (ETF) նախաձեռնությունները դառնում են կարևոր՝ կրթության արդիականացման և մասնագիտական կրթության արդյունավետության բարձրացման համար։

 ETF-ի ծրագրերը Հայաստանում միտված են մասնագիտական կրթության և ուսուցման (VET) համակարգի զարգացմանը՝ այն դարձնելով ավելի ճկուն, ժամանակակից և աշխատաշուկայի պահանջներին համապատասխան։ Ծրագրի շրջանակում իրականացվող վերապատրաստումները և մեթոդական աջակցությունը հնարավորություն են տալիս կրթական հաստատություններին վերանայել ուսուցման մոտեցումները, զարգացնել կարողությունների վրա հիմնված ուսուցումը և ներդնել նորարարական գործիքներ։

 Եվրոպական կրթական հիմնադրամի (ETF) FormA եռօրյա վերապատրաստման ծրագիրը՝ միջին մասնագիտական ուսումնական հաստատությունների դասավանդողների և ղեկավարների համար մեկնարկեց Ֆրանս - հայկական մասնագիտական ուսումնական կենտրոնում: Ծրագրի բացմանը մասնակցել են ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը, ԿԶՆԱԿ հիմնադրամի տնօրեն Ժաննա Հարությունյանը, հիմնադրամի մասնագետներ, ՄԿՈՒ զարգացման ազգային կենտրոնի աշխատակիցներ, մասնագիտական ուսուցման ոլորտի մասնագետներ: 

 ETF-ի աջակցությունը հնարավորություն է տալիս Հայաստան ներմուծել եվրոպական լավագույն փորձը՝ հարմարեցնելով այն տեղական պայմաններին։ Այս համագործակցությունը նպաստում է կրթական համակարգի միջազգային ինտեգրմանը և որակի չափանիշների ներդրմանը։

 Այդ գործընթացը կարևոր է նաև երիտասարդների մրցունակության բարձրացման տեսանկյունից․ եվրոպական չափանիշներին համապատասխան կրթություն ստացած շրջանավարտները ավելի պատրաստ են աշխատելու ինչպես տեղական, այնպես էլ միջազգային աշխատաշուկաներում։

 Հայաստանի կրթական համակարգի զարգացման ճանապարհին նման ծրագրերը կարևոր ներդրում են՝ կրթությունը դարձնելով ոչ միայն գիտելիքի փոխանցման գործընթաց, այլև իրական հնարավորությունների ստեղծման հարթակ։