ՀՀ կառավարության 2023 թվականի մարտի 16-ի N 351-Լ որոշմամբ հաստատված «Հայաստանի Հանրապետության կրթության մինչև 2030 թվականի զարգացման պետական ծրագիրը» հաստատելու մասին» օրենքից բխող գործողությունների ծրագրի «Պետական բյուջեից համայնքային մանկապարտեզներում 0-2 տարեկան երեխաների խմբերի ֆինանսավորում` ապահովելով բոլոր խոշորացված համայնքներում մսուրի ծառայությունների հասանելիություն» միջոցառման շրջանակներում սույն թվականի փետրվարի 27-ին ԿԶՆԱԿ հիմնադրամի կողմից իրականացվեց վերապատրաստում 1- 2 տարեկանների հետ աշխատելու համար ընտրված մասնագետների համար:
Վերապատրաստմանը ներկա էր ՀՀ ԿԳՄՍ նախարարության Հանրակրթության վարչության գլխավոր մասնագետ Թեհմինե Կարախանյանը: Նա ներկայացրեց պիլոտային ծրագրի ներդրման կարևորությունն ու առանձնահատկությունները:
Վերապատրաստման մասնակիցներին ողջունեց ԿԶՆԱԿ հիմնադրամի Հանրակրթության պետական չափորոշչի և ուսումնական ծրագրերի բաժնի պետ Գայանե Մկրտչյանը։
Վերապատրաստումը վարեցին Հանրակրթության պետական չափորոշչի և ուսումնական ծրագրերի բաժնի մասնագետներ Աննա Ամիրջանյանը և Անահիտ Վիրաբյանը:
Վերապատրաստմանը մասնակցեցին «Երևանի հ․ 77 մսուր-մանկապարտեզ» և «Երևանի հ․ 140 մսուր-մանկապարտեզ» ՀՈԱԿ-ների դաստիարակները, դաստիարակի օգնականները, տնօրենները, մեթոդիստները և բուժքույրերը:
ԿԶՆԱԿ հիմնադրամի մասնագետների կողմից ներկայացվեցին Նախադպրոցական կրթության պետական կրթական չափորոշիչը և նախադպրոցական հիմնական ծրագրերը՝ մեկից երկու տարեկանների համար:
Վերապատրաստումների ընթացքում իրականացվեցին գործնական աշխատանքներ, կիրառվեցին «Սարդոստայն», «Մտագրոհ», «Շրջագայություն պատկերասրահում», «Խոսող փայտիկ» և բազմաթիվ այլ մեթոդներ:
Վերապատրաստումն անցավ ջերմ և կառուցողական մթնոլորտում։
Comments
Post a Comment