«Կրթության զարգացման և նորարարությունների ազգային կենտրոն» հիմնադրամի կողմից մշակվել է «Հանրակրթական հիմնական ծրագրեր իրականացնող ուսումնական հաստատության ծնողական խորհրդի գործունեության ուղեցույց»-ը, որը նպատակ ունի նպաստելու հանրակրթական ուսումնական հաստատությունների ծնողական խորհուրդների գործունեության արդյունավետ և իրավաչափ կազմակերպմանը՝ միաժամանակ ապահովելով դպրոցների կառավարման մարմինների լիազորությունների հստակ տարանջատումը և ծնողների ակտիվ մասնակցությունը կրթական գործընթացին։
Ձեռնարկում տեղ են գտել նաև բազմապիսի փաստաթղթերի ձևանմուշներ, որոնք առավել կհեշտացնեն ծնողական խորհուրդների գործունեությունը։
Ձեռնարկը հասանելի է բոլորին, տեղադրված է ԿԶՆԱԿ հիմնադրամի «Ուղեցույցներ» բաժնում և Պաշարների շտեմարանում։
Ավարտեցի ծնողական խորհրդի ուղեցույցի ուսումնասիրությունը։ Շնորհակալություն թիմին կատարված աշխատանքի համար։ Փաստաթուղթը ունի ամուր իրավական հիմք և հստակ նկարագրում է ծնողական խորհուրդների գործառույթները, ինչպես նաև ներառում է օգտակար ձևանմուշներ ու մասնակցության խրախուսման մոտեցումներ։
ReplyDeleteՄիաժամանակ, կարող են դիտարկվել մի քանի ուղղություններ հետագա կատարելագործման համար՝
- հնարավոր կլինի՞ ավելի հստակ ձևակերպել ծնողական ներգրավվածության երկարաժամկետ նպատակը և դրա ազդեցությունը կրթական արդյունքների վրա
- օգտակար կլինի զարգացնել արդյունքահեն մոտեցումը՝ ներառելով չափելի ցուցանիշներ (այդ թվում նաև որակական։ օր․՝ ԾԽ կողմից արված քանի առաջարկ է արվել, քանի՞սն է իրականացվել) և գնահատման մեխանիզմներ
- կարելի է ավելի հստակ կապել ծնողական խորհրդի գործունեությունը ուսուցման որակի և դպրոցական զարգացման ցուցանիշների հետ
- կառավարման և հաշվետվողականության որոշ մեխանիզմներ կարող են լրացվել՝ հատկապես դերերի, պատասխանատվության և կոնֆլիկտների կարգավորման մասով
- ներքին կանոնակարգերի կիրառումը կարող է ավելի գործնականորեն ինտեգրվել՝ որպես վերահսկման, հետադարձ կապի և վերանայման գործիք
Լրացուցիչ, հետաքրքիր կլինի հասկանալ՝ արդյոք ուղեցույցի մշակման ընթացքում իրականացվել են խորհրդակցություններ գործող ծնողական խորհուրդների հետ, և եթե այո՝ ապա քանի՞ խորհուրդ է ներգրավված եղել և ի՞նչ ձևաչափով է ապահովվել այդ հետադարձ կապը։
Ընդհանուր առմամբ, փաստաթուղթը լավ հիմք է ստեղծում մասնակցային կառավարման համար, իսկ վերոնշյալ ուղղությունները կարող են այն ավելի ամրապնդել՝ դարձնելով ավելի համակարգային և արդյունքահեն գործիք։