ԿԶՆԱԿ հիմնադրամի մասնագետի և փորձագետների համագործակցությամբ 2026 թվականի
օգոստոսի 24-27-ը կազմակերպվեցին «Անվտանգ կենսագործունեություն» առարկայի
ուսուցիչների և ուսումնական հաստատությունների շտաբի պետերի վերապատրաստման
դասընթացներ, որում ներգրավված էին հմուտ մասնագետներ և՛ զինվորական
փորձառությամբ, և՛ մանկավարժական։ Դասընթացին մասնակցեց շուրջ 1200 մանկավարժ։
Վերապատրաստումների անհրաժեշտությունը պայմանավորված է հանրակրթության համակարգում
«Անվտանգ կենսագործունեություն» նոր առարկայի չափորոշչի և ուսումնական ծրագրերի
ներդրմամբ։
Դասընթացների նպատակն է զարգացնել մասնակիցների
մասնագիտական գիտելիքները, կարողությունները և գործնական հմտությունները։
Դասընթացներն անցկացվեցին հեռավար ձևաչափով՝ նախապես
մշակված դասացուցակի համաձայն։ Յուրաքանչյուր խմբի համար ապահովված էր վերապատրաստման
ամբողջական ծրագիր՝ ընդգրկելով չափորոշչային, մասնագիտական և մեթոդական
բաղադրիչները։
Վերապատրաստման բովանդակությունը ներառում էր նոր չափորոշչի
և ծրագրերի ներկայացում, 5-րդ և 10-րդ դասարանների ծրագրերի
ուսումնասիրություն, առաջին օգնության, կենցաղային և տեղեկատվական անվտանգության,
գոյատևման, արտակարգ իրավիճակների ու քաղաքացիական պաշտպանության թեմաներ։
Առանձին ուշադրություն էր դարձվում նաև դասավանդման
ժամանակակից մեթոդներին, թեմատիկ և օրվա դասի պլանավորմանը, գործնական
պարապմունքների կազմակերպմանը։
Վերապատրաստումները կարևոր քայլ են նոր չափորոշչի և
ծրագրերի միասնական ընկալման, դրանց արդյունավետ ներդրման և դպրոցներում անվտանգության
մշակույթի ձևավորման ուղղությամբ։
Comments
Post a Comment